Tiltøk hjá Arktiska ráðnum um tilbúgving og fyrstuhjálp

Reyði Krossur Føroya hevur hesa vikuna luttikið á tveimum tiltøkum hjá Arktiska ráðnum í Føroyum, har sjóneykan hevur verið sett á tilbúgving, samstarv og lokalan førleika í arktiskum samfeløgum.

Á ráðstevnuni Cold Seas – Critical Gaps legði Reyði Krossur fram eina felags keynote við sjónarhornum frá IFRC, Norska Reyða Krossi og Reyða Krossi Føroya. IFRC greiddi frá leiklutinum hjá Reyða Kross-rørsluni í tilbúgving og humaniterum átøkum, meðan Norski Reyði Krossur deildi royndir og lærdóm frá Viking Sky-hendingini í 2019, tá eitt stórt ferðamannaskip kom í álvarsama neyð út fyri norsku strondini.

Reyði Krossur Føroya setti sjóneykuna á føroyska samanhangin – okkara kapasitet og leiklut, styrkir og avbjóðingar hjá einum lítlum oyggjasamfelagi og týdningin av sjálvbodnum, lokalkunnleika og greiðum samstarvi, áðrenn ein kreppa rakar.

Fríggjadagin 16. oktober, á altjóða hjartastartardegnum, varð eisini skipað fyri Arctic CPR Day. Her vórðu royndir úr Føroyum, Noregi og Kanada deildar um fyrstuhjálp og hjartalungabjarging í arktiskum og fjarskotnum samfeløgum.

Fyrstahjálp hevur verið ein partur av Reyða Krossi Føroya gjøgnum alla 100 ára søgu felagsskapsins. Í dag síggja vit fyrstuhjálparundirvísing ikki bara sum eitt kjarnuøki hjá Reyða Krossi, men eisini sum ein ítøkiligan hátt at byggja lokalan førleika og styrkja tilbúgvingina í samfelagnum. Jú fleiri fólk duga og tora at hjálpa, tá nakað hendir, jú sterkari stendur lokalsamfelagið.

Tiltøkini hava eisini verið ein góður møguleiki at deila royndir og styrkja samstarv og sambond – bæði innan Reyða Kross-rørsluna og við myndugleikar og aðrar tilbúgvingaraktørar úr arktiska økinum.