Summarútferð fyri sjálvboðin

Góð 100 sjálvboðin í Reyða Krossi vóru í gjár á summarútferð í Eysturoynni.

Í ár gekk túrurin til Selatraðar, Runavíkar og Nes, har vit bæði upplivdu, hoyrdu frá søgu og umhvørvi, gingu lættar túrar og hugnaðu okkum saman gjøgnum allan dagin.

Árliga útferðin er eitt gott høvi at savnast tvørtur um tey ymsu virksemisøkini í Reyða Krossi og njóta eina hugnaliga løtu saman.

Hjartans takk til øll, sum vóru við til at gera dagin so góðan og minnisverdan: til Berghild og Klæmint á Selatrað fyri hugtakandi frásøgn, til Tórbjørn Jacobsen fyri upplýsandi framløgu í Løkshøll, til Alfred Olsen, Súna í Hjøllum og Janus Jensen fyri frásagnir og ferðaleiðslu í bussunum, til Ólav Magnussen fyri frásøgnina um Fríðrikskirkjuna, til Jóanis Erik Køtlum fyri harmonikutónleik undir felagssanginum og til Kára Sverrisson fyri vøkru framførsluna í kirkjuni.

Túsund takk til øll, sum stuðlaðu og vóru við til at gera dagin so góðan – og ikki minst til tykkum sjálvbodnu, sum eru grundarlagið undir arbeiðinum hjá Reyða Krossi.