Edward Fuglø hevur málað serstakan málning til 100 ára hátíðarhaldið hjá Reyða Krossi
Málningurin verður seldur á uppboðssølu undir Landsinnsavningini leygarkvøldið 31. oktober. Allur ágóðin fer til hjálpararbeiðið hjá Reyða Krossi.
Í ár eru 100 ár liðin, síðan Reyði Krossur Føroya varð stovnaður, og í tí sambandi hevur Edward Fuglø málað eitt forkunnugt listaverk, sum nú verður boðið út til frama fyri hjálpararbeiðið.
Vit eru sera fegin um og takksom fyri, at Edward hevur gjørt hetta serliga verkið til okkara 100 ára hátíðarhald, og vónirnar eru, at uppboðssølan fer at vekja stóran áhuga og geva eitt gott íkast til hjálpararbeiðið.
Vit almannakunngera nú eina mynd av málninginum, so bæði einstaklingar og fyritøkur fáa høvi at síggja verkið frammanundan og hava tíð at umhugsa, um tey vilja bjóða upp á hann leygarkvøldið.
Uppboðssølan verður undir beinleiðis Landsinnsavningini, sum verður send úr Norðurlandahúsinum í Kringvarpi Føroya leygarkvøldið 31. oktober kl. 19.00.
