Betri og Reyði Krossur hava undirskrivað nýggja stuðulsavtalu

Í dag hava Betri og Reyði Krossur Føroya undirskrivað nýggja stuðulsavtalu, sum tryggjar framhaldandi stuðul til Samarittarnar, Ársins fyrstuhjálpara og Ársins barnaheiður og fyrstuhjálparundirvísingina fyri 7. floksnæmingar kring landið.

Betri hevur í nógv ár verið ein trúgvur og hollur stuðul hjá Reyða Krossi Føroya, og nýggja avtalan byggir víðari á góða samstarvið millum partarnar.

Avtalan fevnir um fastan stuðul til Samarittarnar, Ársins fyrstuhjálpara og Ársins barnaheiður og fyrstuhjálparundirvísingina fyri 7. floksnæmingar kring landið.

Samarittarnir hjá Reyða Krossi eru sjálvboðin, sum eru útbúgvin innan kropsliga og sálarliga fyrstuhjálp og eru til staðar á tiltøkum kring landið. Stuðulin er við til at tryggja karmarnar um hetta arbeiðið, millum annað við útgerð og búnum.

Við Ársins fyrstuhjálpara og Ársins barnaheiðri varpar Reyði Krossur ljós á fólk og børn, sum hava framt serlig avrik innan fyrstuhjálp. Endamálið er samstundis at minna á týdningin av at duga fyrstuhjálp og eggja enn fleiri fólkum til at læra seg hana.

Fyrstuhjálparundirvísingin fyri 7. floksnæmingar hevur somuleiðis eitt langsiktað endamál: at geva børnum grundleggjandi førleikar í fyrstuhjálp og soleiðis við tíðini hækka trygdarstigið í føroyska samfelagnum.

Stuðulin frá Betri hevur ómetaliga stóran týdning fyri Reyða Kross Føroya og gevur okkum møguleika at halda fram við og menna arbeiðið innan fyrstuhjálp og tilbúgving.

Vit eru sera takksom fyri álitið og fyri trúgva stuðulin, sum Betri hevur veitt Reyða Krossi gjøgnum nógv ár. Langtíðar samstarv sum hetta gevur okkum betri møguleika at leggja arbeiðið til rættis og tryggja, at átøk, sum gera ítøkiligan mun í samfelagnum, kunnu halda fram.

Mynd: Evy J. Jacobsen, forstjóri í Betri P/F, og Jóannes Eidesgaard, formaður í Reyða Krossi Føroya, undirskriva nýggju stuðulsavtaluna.