800.000 kr. í neyðhjálp til Venesuela

Reyði Krossur Føroya og Føroya landsstýri lata í felag 800.000 krónur í neyðhjálp til Venesuela.

Mikudagin 24. juni raktu tveir stórir jarðskjálvtar norður- og mið Venesuela. Jarðskjálvtarnir raktu við fáum sekunds millumbilum og eru mátaðir til at vera 7,2 og 7,5 á Richterstiganum. Jarðskjálvtamiðdepilin var mátaður at vera nærhendis Morón og Yumare, í statunum Carabobo og Yaracuy, sum liggja vestanfyri høvuðsstaðin Caracas. Jarðskjálvtarnir merktust í størsta partinum av landinum umframt í pørtum av Kolumbia, Karibia og Brasil. Ristingar eru mátaðar so langt sum 1.700 km frá jarðskjálvtamiðdeplinum, heilt í Amasonas í Brasil.

Stjórnin í Venesuela hevur lýst neyðstøðu í landinum. Tað verður mett, at 9,7 milliónir fólk eru ávirkað av hendingunum. Teirra millum hava 530.000 fólk verið útsett í ógvusligastu ristingunum. Sambært nýggjastu tølunum hava 1.450 fólk latið lív, og 3.150 eru løstað, men hesi tølini vaksa í heilum so hvørt fólk verða funnin aftur í húsaleivdum.

Infrastruktururin er somuleiðis hart raktur, og fleiri enn 204 bygningar eru dottnir niður, 217 bygningar hava fingið stórar skaðar, og 300 aðrir hava fingið nakað av skaða.

Reyði Krossur í Venesuela hevur fingið umbønir frá familjum, sum leita eftir fleiri enn túsund familjulimum. Størsti partur av hesum umbønum koma úr havnabýnum La Guaira nærhendis høvuðsstaðnum Caracas.

Sambært statistiskum framrokningum hjá USGC kunnu væntast millum 1.000 og 10.000 deyð og løstað í hesum báðum jarðskjálvtunum.

Tað vil siga, at túsundtals fólk hava mist sítt heim ella heimið hevur fingið stóran skaða, og samfelagskritisk undirstøðukervi, sjúkrahús, vatnveiting, elveiting og fjarskifti eru nógv tarnað. Humaniteru tørvirnir eru ómetaliga stórir, serliga innan bráðfeingis heilsuhjálp, fyribils bústaðir, reint vatn, reinføri og sálarligan stuðul.

 

Stuðul úr Føroyum

Føroya landsstýri hevur játtað Reyða Krossi Føroya 400.000 kr. til neyðhjálpararbeiðið og Reyði Krossur Føroya leggur somu upphædd afturat úr egnum kreppumiðlum, soleiðis at samlaði føroyski stuðulin til átakið verður 800.000 kr.

Endamálið við stuðlinum er at hjálpa teimum, sum eru harðast rakt av jarðskjálvtunum. Átakið fevnir um lívbjargandi neyðhjálp og hjálp til familjurnar at koma fyri seg aftur, herundir neyðhjálp og útflýggjan av neyðsynjarvørum, bjargingararbeiði, heilsuhjálp, fyrstuhjálp og sálarligan stuðul, vatn-, reinføri- og heilsutiltøk, og hjálp til familjur, ið hava mist samband við avvarðandi. Síðan verður stuðulin eisini brúktur til at trygga endurbygging og kontantstuðul til húsarhald, har tað er møguligt.

Stuðulin verður veittur gjøgnum IFRC Emergency Appeal, sum Altjóða Reyða Kross Føderatiónin (IFRC) stendur fyri, í samstarvi við Venesuelska Reyða Kross. Hetta tryggjar at hjálpin verður veitt, har tørvurin er størstur við teimum metingum, sum verða gjørdar á staðnum.

  1. Føroyskur stuðul styrkir trygga føðihjálp í Niger

    P NER0253 Jpg

    Við føroyskum stuðli verður arbeitt fyri at geva kvinnum í Zinder-økinum í Niger tryggari atgongd til heilsutænastur í sambandi við barnsburð. Verkætlanin er partur av altjóða virkisætlanini hjá Reyða Krossi Føroya og Føroya landsstýri. Vit hava nú fingið ein nýggjan film úr Niger, sum vísir naka...

    Les meira um Føroyskur stuðul styrkir trygga føðihjálp í Niger
  2. 100 ára hátíðarhald

    30Okt26 84A5403

    Fríggjakvøldið 30. oktober varð 100 ára dagurin hjá Reyða Krossi Føroya hátíðarhildin í Skeiva Pakkhúsi. Til hátíðarhaldið vóru sjálvbodnir virksemisleiðarar, fyrrverandi og núverandi forfólk, stuðlar og samstarvspartar, umboð fyri Reyða Kross úr grannalondunum og umboð fyri landsins leiðslu. Tað...

    Les meira um 100 ára hátíðarhald
  3. Elisabeth vann bilin

    3W3A3454 Exp

    Tað var ein ovurfegin Elisabeth Petersen úr Fuglafirði, sum í dag fekk handað nýggja bilin, sum hon vann í sambandi við Landsinnsavningina. Elisabeth hevði stuðlað við at keypa ein lutaseðil, sum so vísti seg at vera hepni vinnaraseðilin! Hon gjørdist ikki sørt ovfarin, tá Elin á Rógvi ringdi...

    Les meira um Elisabeth vann bilin