En Stuðla Gerst sjálvboðin
Stuðla

Nevndin og virksemisleiðarar

Media (1)

Um nevndina

Nevndin er ovasta leiðslan í Reyða Krossi Føroya.

Í nevndini eru sjey limir, ið øll eru sjálvboðin og ólønt. 

Nevndarlimirnir verða valdir á árliga aðalfundinum, ið verður hildin um várið.

Tað eru limir hjá Reyða Krossi Føroya, ið velja limir í nevndina.

  • Jóannes Ejdesgaard

    Formaður

    Joannes Eidesgaard Formaður +298 59 98 00 joanneseidesgaard@gmail.com

    Jóannes Ejdesgaard

    Formaður

    Joannes Eidesgaard

    Yrki:

    Pensjónistur, fyrrverandi politikari og løgmaður, útbúgvin fólkaskúlalærari.

    Ábyrgdarøki í Reyða Krossi: 

    Formaður í Reyða Krossi Føroya síðan 2015. 

    Serlig ábyrgd av: 

    - Landsinnsavning
    - Fundraising

    Um: 

    Jóannes Eidsgaard hevur verið formaður í Reyða Krossi Føroya síðan 2015, tá hann samstundis varð valdur í nevndina fyri fyrstu ferð.
    Jóannes er føddur í 1951 og uppvaksin á Tvøroyri. Í sínum arbeiðslívi hevur hann verið politikari og løgmaður, og er annars útbúgvin lærari. Í dag er hann pensjóneraður.
    Um tað mundið Jóannes fór í nevndina í Reyða Krossi, hevði hann gjørt av at leggja frá sær sum politikkari. Jóannes Eidesgaard hevur sitið upp móti 13 ár í Landsstýrinum, og hann vísir á, at størsta orkan varð løgd í arbeiðslívið og tí vildi hann, at familjan, serliga abbabørnini, skuldu fáa ágóðan av tíðini hann nú fór at hava eftir hetta.
    Tá tað kemur til Reyða Kross hevur Jóannes bert gott at bera teimum sjálvbodnu:
    - Tað sjálvbodna arbeiðið hevur altíð tiltalað meg. Eg haldi tað vera fantastiskt at koma inn í ein felagsskap sum Reyða Kross at síggja hesi livandi menniskjuni, sum ofra sína tíð og orku upp á at gera eitt totalt ósjálvsøkið arbeiði, har tey brúka sína orku upp á at stuðla øðrum. Tað er fantastiskt, sigur hann, og vísir á tíðina tá korona herjaði:
    - Tá legði eg merki til, at tey vóru nógv, sum saknaðu at vera sjálvboðin, tí tað var ein partur av teirra lívi.
    Sum formaður í Reyða Krossi er Jóannes Eidesgaard glaður um at kunna geva samfelagnum okkurt aftur av tí, sum hann hevur fingið litið í hendurnar á síni lívsleið:
    - Tá hetta við Reyða Krossi stakk seg upp hugsaði eg við mær sjálvum, at eg hevði verið priviligeraður og verið borin uppi av einum áliti frá fólkinum – tí tú kanst onki gera, uttan tú fært álit frá fólkinum – at hetta var kanska ein møguleiki at bera okkurt aftur til samfelagið. Tí hevur tað verið ein fragd fyri meg at verið partur av Reyða Krossi hesi árini og eg haldi tað verður bara meir og meir spennandi.
    Formaðurin vísir á, at tá Torfinn Højgaard og hann komu í nevndina í 2015 var felagsskapurin ein heilt annar enn hann er í dag.
    - Her er ein øgiligur dynamikkur og ein vakstrarhugur í dag. Tað koma allatíðina hugskot um at víðka um virksemið upp á ymsar mátar, sigur hann.
    Hann heldur tað vera konstruktivt, at øll 450 sjálvboðin hava sama upplivilsið av Reyða Krossi:
    - Tað er ein jaligur arbeiðsandi. Onki við at hugsa ”á, aftur til arbeiðis og nær fáa vit frí…” – tvørturímóti er tað ein sera jaligur og upplyftandi stemningur rundanum alt arbeiðið hjá Reyða Krossi.
    Um framtíðina hjá Reyða Krossi er formaðurin vissur:
    - Reyði Krossur verður ongantíð arbeiðsleysur, tað er púra sikkurt. Tað eru so nógv, ið hava tørv á einari hjálpandi hond. Náttúran ger øgiligt um seg við veðurlagsbroytingum. Vit síggja ógvusligar náttúruvanlukkur, turkur, yvirflóð, tsunamiir, jarðskjálvtar, eldgos, skógareldar, sum aftur hava við sær, at tað er hungur nógvastaðni í heiminum. Og so hava vit tíverri tað omaná, at kríggj er í nógvum pørtum í heiminum, enntá í okkara egna parti. Og tað ger so tað, at hjálparuppgávan bara veksur uppaftur meir.
    Hann sigur, at kjakið ongantíð snýr seg um, um nakar hevur tørv á hjálp, men heldur hvørjum Reyði Krossur skal veita hjálp næst.
    - Vit royna á bestan hátt at gera skilagóðar fordeilingar av tí, sum vit senda út. Vit senda rættiliga stórar upphæddir út í heim og vit hava fyriskipað innsavningar, ið muna øgiliga nógv. Millum annað høvdu vit ”Ukrainahjálpina” uppi í Hoyvík, sum gav níggju milliónir. Sjey av teimum milliónunum fóru beinleiðis til hjálpararbeiði í Ukraina. So Reyði Krossur hevur gjørt ein øgiligan mun úti í heimi.
    At enda greiðir hann frá, at nógv kjak hevur verið um, at Reyði Krossur eisini skal hjálpa í Føroyum, og tað hevur nevndin tikið til sín.
    - Har er m.a. virksemið hjá okkum við mat- og klædnahjálp vaksið heilt nógv seinastu árini. So, viftan av hjálpararbeiði, ið Reyði Krossur veitir er heilt stór - bæði her heima og úti í heimi, sigur formaðurin.

  • Tórfinn Højgaard

    Næstformaður

    Torfinn Hojgaard Næstformaður +298 25 14 99 torfinn.hoejgaard@gmail.com

    Tórfinn Højgaard

    Næstformaður

    Torfinn Hojgaard

    Yrki:

    Pensjónistur, lærari í 40 ár, hevur verið sjálvboðin í Lion's Club Føroyum og í ymsum ítróttarhøpi.

    Ábyrgdarøki í Reyða Krossi:

    Næstformaður í Reyða Krossi síðan 2015. 

    Serlig ábyrgd av:

    - Røkt av húsum í Stiðjagøtu og á Bryggjubakka
    - Klædnainnsavning
    - Klædnaskiljing

    Um: 

    Torfinn hevur verið í nevndini hjá Reyða Krossi síðani 2015, tá hann varð valdur sum næstformaður á fyrsta sinni.

    Í sínum arbeiðslívi hevur Torfinn verið lærari í 40 ár. Harumframt hevur hann í frítíðini verið sjálvboðin í Lion’s Club Føroyum í rúma tíð og hevur eisini verið aktivur í ítróttarhøpi.

    Eitt, sum Torfinn minnist við gleði aftur á hesa tíðina hann hevur verið í nevndini, er, tá høvuðsbygningurin hjá Reyða Krossi varð bygdur um, og handil og klædnaskiljing gjørdist partur av virkseminum í bygninginum.

    Hann greiðir frá, at Reyði Krossur átti bygningin, men at fleiri leigumál vóru í hinum endanum av húsunum. Nevndin gjørdi av at siga hesi leigumálini upp, tí ein endurnýtsluhandil og klædnaskiljing skuldi vera í niðastu hæddini:

    "Hetta var upprunaliga ein lagurbygningur og eg minnist, at tað eina rúmið fylti tvær hæddir. Tað var nógv arbeiði, sum skuldi gerast og samskipast, og eg minnist at eg eisini bókstaviliga mátti liggja á gólvinum fyri at slípa nakrar jarnlistar niður. Tað var ein ótrúliga spennandi tíð og prosjekt at vera við til.

    Vit vóru ikki heilt viss í, hvussu tað fór at ganga við handlinum, men tað vísti seg, at handilin saktans kundi javnviga inntøkurnar, ið vit annars høvdu fingið inn fyri leigumálini, ið vit noyddust at siga upp fyri at taka allan bygningin í nýtslu. Hetta var ein kjansur vit valdu at taka, so eg eri serliga fegin um, at tað eydnaðist, og at handilin gongur so væl sum vit síggja, at hann ger í dag", sigur hann.

    Sum næstformaður hava uppgávurnar hjá Torfinni verið ymiskar, men hann hevur millum annað gjørt nógv burturúr at vitja fólk, skúlaflokkar og bólkar av ymsum slag, ið hava savnað pengar inn og hevur tikið ímóti hesum gávum fyri Reyða Kross.

  • Mary-Ann Thomsen

    Kassameistari

    Mary Ann Thomsen Kassameistari +298 23 33 38 kassameistari@redcross.fo

    Mary-Ann Thomsen

    Kassameistari

    Mary Ann Thomsen

    Yrki:

    Fíggjarleiðari hjá Solar Føroyar P/F. Er útbúgvin HA frá Københavns Handelhøjskole/B.Sc. in Economics and Business Administrations frá CBS (Copenhagen Business School)

    Ábyrgdarøki í Reyða Krossi:

    Kassameistari síðan 2012. Tekur sær av øllum bókhaldi og kassauppgerðum, og er sjálvboðin í Reyðakrossbúðini á Bryggjubakka og í Bókasøluni.

    Serlig ábyrgd av: 

    - Tryggingar, bankaviðurskifti, fíggjarviðurskifti
    - Mat- og klædnahjálpin
    - Bókasølan
    - Endurnýtsluhandlarnir

    Um: 

    Mary-Ann er fíggjarleiðari og arbeiðir til dagligt hjá Solar Føroyar P/F. Hon er útbúgvin HA frá Københavns Handelshøjskole/B.Sc. in Economics and Business Administration frá CBS (Copenhagen Business School).
    Mary-Ann hevur verið Kassameistari fyri Reyða Kross seinastu 12 árini. Hon varð vald í nevndina í 2013 og gjørdist kassameistari. Hon hevur stillað upp og er endurvald hvørja ferð síðan tá.
    Sum kassameistari hevur Mary-Ann ábyrgdina av øllum bókhaldinum hjá Reyða Krossi. Hon sigur, at nú uppgávurnar gerast alt fleiri og starvsfólkini leggjast afturat í umsitingini, so eru nakrar uppgávur lagdar á skrivstovuna.
    Og nógv er broytt hesa tíðina:
    "Størsta broytingin er starvsfólkahópurin og økini, vit eru farin inn á. Tað heilt stóra peningaliga er handilin í Stiðjagøtu, sum hevur kastað so nógv av sær. Irena Jacobsen skipaði fyri, at vit fingu hendan handilin. Hon ruddaði alt og ornaði møblar – hon legði standardin fyri, hvussu handlarnir skuldu síggja út. Og hon fekk nevndina við upp á, at tað skuldi vera endurnýtsluhandil í Stiðjagøtu. Áðrenn hetta høvdu vit Bókasøluna og handilin við endurnýtsluklæðum og tingum á Bryggjubakka – og so plagdi at vera loppumarknaður tvær ferðir um árið, har Reyðakrossbúðin í Stiðjagøtu er nú."
    Tað vóru 14.000 skjøl í bókhaldinum fyri 2024 - tað er tað sama sum uml. 270 skjøl um vikuna. Harafturat ger Mary-Ann allan roknskapin og kassauppgerðirnar fyri allar handlarnar hjá felagsskapinum. Alt hetta tilfarið verður hegnisliga umsitið av Mary-Ann – sum ger hetta sjálvboðið. Av tí, at hon arbeiðir sjálvboðin sparir hon eisini Reyða Krossi sera nógvar pengar.
    At virksemið í felagsskapinum er nógv vaksið merkist aftur í arbeiðnum við bókhaldinum:
    "Eg má arbeiða meir enn eina ferð um vikuna við bókhaldinum. Og tá landsinnsavning er, eru øgiliga nógvar bókingar. Tá plagi eg at fáa onkran at hjálpa mær at fylgja við, hvussu nógv kemur inn. Tá er øgiliga stuttligt at fylgja við og tað er eisini rættiliga hugnaligt."
    Mary-Ann hevur brúkt mestu tíðina í Reyða Krossi í nevndini og havt bókhaldið, men hon hevur eisini hjálpt til í umsitingini og verið við í mathjálpini tá hendan byrjaði. Í desember 2024 gjørdist hon virksemisleiðari í Bókasøluni og nú hjálpir hon eisini til í Reyðakrossbúðini á Bryggjubakka.

  • Fía Niclasen

    Nevndarlimur

    Fia Niclasen Nevndarlimur +298 50 44 40 fianiclasen@gmail.com

    Fía Niclasen

    Nevndarlimur

    Fia Niclasen

    Yrki:

    Aðalskrivari í Føroya Náttúru- og Umhvørvisfelagi, og er samskipari fyri norðurlendska Náttúruprogrammið undir Norðurlanda Ráðharraráðnum. Hevur útbúgving innan verkætlanarleiðslu, innovatión og burðardygd, og náttúru- og umhvørvisvernd frá universiteti í Stórabretlandi.

    Ábyrgdarøki í Reyða Krossi:

    Verið nevndarlimur síðan 2023. 

    Serlig ábyrgd:

    - Flóttahjálpin
    - Familjulegan / Intercultural Family Camp
    - Reyða Kross Vinir / Red Cross Buddies
    - Málkafé

    Um: 

    Fía hevur lisið BSc. í leiðslu og íverksetan og MSc. í umhvørvistøkni í Stórabretlandi. Til dagligt arbeiðir hon sum aðalskrivari í Føroya Náttúru- og Umhvørvisfelag.
    Fía Niclasen byrjaði sum sjálvboðin í Reyða Krossi í 2010 – 2013. Tá arbeiddi hon í handlinum á Bryggjubakka og var eisini við til at stovna Ung í Reyða Krossi. Aftaná nøkur lestrarár uttanlands flutti Fía aftur til Føroya og fekk tá starv á skrivstovuni hjá Reyða Krossi sum verkætlanarleiðari fyri flóttafólkamóttøkuna. Aftaná eina tíð fekk hon bjóðað annað starv, men hóast tað vildi Fía fegin vera við at stuðla arbeiðnum hjá Reyða Krossi á annan hátt:
    ”Tá eg gavst á skrivstovuni ynskti eg at halda fram at stuðla fantastiska arbeiðinum sum Reyði Krossur Føroya ger, og valdi tí at fara upp í nevndina. Tað er ein stórur stoltleiki at vera í Reyða Krossi, og eg var ikki klár at sleppa tí heilt, hóast eg fór í eitt nýtt starv. Tað, at eg visti, hvussu dagliga arbeiðið gekk fyri seg og at eg hevði meiningar um, hvørji átøk vit burdu farið í holt við, gjørdi, at eg valdi at stilla upp – og nú havi eg verið í nevndini í tvey ár.”
    Í løtuni fæst hon mest við nevndararbeiði, men er eisini í ferð við at menna eina langtíðarstrategi fyri Reyða Kross Føroya.
    Fía hevur nógvar hugsanir um framtíðar virksemið hjá felagsskapinum:
    ”Eg ynski, at vit styrkja økini hjá okkum enn meir, so sum alt sosiala virksemið og endurnýtsluna, men tað er eisini týdningarmikið, at vit framhaldandi nøkta tørvir, ið stinga seg upp", sigur hon.
    Fyri Fíu hevur kenslan av felagsskapi ótrúliga nógv at siga - og mátin, ið Reyði Krossur arbeiðir upp á er nakað heilt fyri seg:
    ”At tað eru so nógv folk, sum eru klár at traðka til, tá tað veruliga stendur á, er so rørandi, haldi eg. T.d. tá tað bleiv greitt, at Føroyar fóru at taka ímóti flóttafólkum og 400 sjálvboðin vóru klár at traðka til er fantastiskt - og óhoyrt upp á nógvar mátar!”

  • Tommy Petersen

    Nevndarlimur

    Tommy Petersen Nevndarlimur +298 22 88 13 ptommy049@gmail.com

    Tommy Petersen

    Nevndarlimur

    Tommy Petersen

    Yrki:

    Pensjóneraður, útbúgvin løgfrøðingur og sosialráðgevi, starvaðist í fleiri ár hjá DANIDA sum administrativur ráðgevi hjá embætisfólkum og politakarum í Nepal, Irak, Egyptalandi og Palestina. Er fyrrverandi stjóri í Almannastovuni (í dag almannaverkið), Sjóvinnustýrinum og fyrsti stjóri á Føroya Kærustovni.

    Ábyrgdarøki í Reyða Krossi:

    Limur síðan 2023 og tiltakslimur árini 2023-2025, valdur nevndarlimur í 2025.

    Serlig ábyrgd: 

    - Løgfrøðilig viðurskifti
    - Sáttmálar, avtalur og tílíkt

    Um: 

    Tommy er føddur í 1949, og hevur nomið sær útbúgving innan sosialráðgeving og løgfrøðiligt embæstisprógv, cand.jur.
    Hóast Tommy hevði aldurin at fara á pensjón í 2016, so hevur hann verið virkin í arbeiðslívinum, bæði uttanlands og í Føroyum, heilt til 2023. Hann er fyrrverandi stjóri í Almannastovuni, sum í dag er Almannaverkið, var stjóri í Sjóvinnustýrinum og fyrsti stjóri á Føroya Kærustovni. Hann hevur eisini verið knýttur at vinnulívinum, millum annað sum fulltrúi í Vinnumálaráðnum.
    Tommy hevur verið limur í Reyða Krossi síðan 2023, og verið tiltakslimur líka leingi. Á aðalfundinum 30. mars í 2025 varð hann valdur nevndarlimur á fyrsta sinni.
    Leikluturin hjá honum í Reyða Krossi er at veita ráðgeving í løgfrøðiligum spurningum. Hesa vegleiðing veitir hann bæði starvsfólki og teimum, ið leita sær hjálp hjá Reyða Krossi. Afturat hesum hevur hann eisini undirvíst starvsfólkum í reglum í almennari umsiting:
    ” Eg leggi stóran dent á at stuðla nevndini og starvsfólkum í fakligum og løgfrøðiligum spurningum og haldi tað vera áhugavert, hvussu áhugaðir limirnir eru og hvussu høgt fakliga støðið er hjá limum og starvsfólki”, sigur hann.
    Sum nevndarlimur hevur Tommy eisini umboðað Reyða Kross Føroya á ársfundi hjá danska Reyða Krossi.
    Í fleiri ár arbeiddi Tommy fyri DANIDA sum administrativur ráðgevi hjá embætisfólkum, politikarum og stovnum í menningarlondum, og hevur hjálpt teimum at skipa stovnar teirra betri. DANIDA er danskt samstarv við menningarlond, sum leggur serligan dent á at basa fátækradømi við at tryggja mannarættindi og við at betra um búskapin í einstaka landinum.
    Sum starvsfólk í DANIDA hevur Tommy verið í Nepal, Irak, Egyptalandi og Palestina.
    Starvið fyri danska uttanríkismálaráðið hevur givið honum eitt serstakt innlit í hjálpararbeiði og hann leggur sjálvur nógv fyri, at vitanin, sum hann liggur inni við frá sínum fjølbroytta arbeiðslívi verður gagnnýtt í Reyða Krossi Føroya:
    ”Eg havi arbeitt nógv við hjálpararbeiði í menningarlondum, sum ger, at eg havi serstaka vitan um, hvussu hetta arbeiðið gongur fyri seg. Alt lívið havi eg havt stóran áhuga fyri menningararbeiði og hjálpararbeiði, so tí gevur tað góða meining fyri meg at vera við í Reyða Krossi og geva mítt íkast til nevndararbeiðið her”, sigur Tommy Petersen at enda.

  • Eyrith Guttesen Leyni

    Tiltakslimur

    Eyrith Guttesen Leyni Tiltakslimur +298 51 37 84 eyrith@gmail.com

    Eyrith Guttesen Leyni

    Tiltakslimur

    Eyrith Guttesen Leyni

    Yrki:

    Pensjónistur, lisið Merconom og skattarætt, fyrrverandi skrivari hjá kommandørinum í donsku verjuni, starvaðist á Líkningardeildini hjá Tórshavnar kommunu, verið bókhaldari hjá CCJ, arbeitt hjá DFDS, verið handilskvinna.

    Ábyrgdarøki í Reyða Krossi:

    Limur í Reyða Krossi síðan 1995, er Virksemisleiðari í Vitjanartænastuni í Tórshavnar kommunu - gjørdist virksemisleiðari í 2007.

    Serlig ábyrgd: 

    - Vitjanartænastan
    - Filateli

    Um: 

    Eyrith byrjaði í Reyða Krossi longu í 1995 tá hon byrjaði í Vitjanartænastuni. Húsið, sum í dag húsar Reyðakrossbúð á tveimum hæddum og Bókasøluni í niðastu hæddini, varð keypt í 1993. Eyrith minnist eisini, at klæðir vórðu savnað um somu tíð, sum vórðu pakkað og send av landinum, møguliga til danska Reyða Kross.
    Eyrith Guttesen Leyni kom upp í nevndina hjá Reyða Krossi Føroya í 2015 sum tiltakslimur. Síðani hevur hon verið nevndarlimur í nøkur ár til hon í vár gjørdist tiltakslimur aftur.
    Í sínum arbeiðslívi hevur Eyrith Guttesen Leyni gjørt mangt ymiskt. Millum annað hevur hon arbeitt í Heimavirkinum, hjá Poul Restorff, í handlinum ”Joto 9”, verið bókhaldari hjá Karl á Lag (CCJ), arbeitt hjá DFDS, og startaði upp samtíðarskattin (kelduskattin) saman við fleiri øðrum, tá hon var yvirassistentur á Líkningadeildini hjá Tórshavnar kommunu. Har var hon í tíggju ár. Flestu árini starvaðist hon í donsku verjuni sum skrivari hjá kommandørinum, har hon var í tilsamans 20 ár til hon fór á pensjón í 2007.
    Eyrith hevur útbúgving frá Handilsskúla, har hon hevur lisið Merconom og Skattarætt og hevur prógv í enskum frá Fróðskaparsetrinum.
    Í Reyða Krossi er tað Vitjanartænastan, sum er hjartabarnið hjá Eyrith. Har hevur hon verið í tveimum tíðarskeiðum. Tá hon byrjaði í 1995 vóru trý álitisfólk fyri Vitjanartænastuna í Havn.
    Í 2007, tá Eyrith bleiv pensjónerað, hevði hon verið burturfrá Vitjanartænastuni í nøkur ár, men varð um hetta mundið spurd um at gerast leiðari fyri Vitjanartænastuna. Hon tók av uppgávuni og leiddi tænastuna saman við Marin Samuelsen frá 2008.
    - Marin og eg arbeiddu væl saman. Vit kendu báðar fólk í Havnini, so vit vistu, hvørji fólk vit kundu seta í samband við hvørt annað.
    Í dag hevur Malan Tauser tikið við hesari uppgávuni saman við Eyrith.
    - Vit hava verið 40 vitjanarvinir, sum hava vitjað heima hjá fólki og á røktarheimum - vit prioritera altíð fólk, sum sita einsamøll heima. Tað er týdningarmikið, at tey man setur saman eru á bylgjulongd.
    Áhugin fyri at fáa vitjanarvin er vaksin síðan 2007. Frá at vera átta, sum ynsktu sær vitjanarvin tá eru tey umleið tretivu í dag.
    Og hetta arbeiðið liggur henni nær. Eyrith er áhugað at fáa fleiri fólk at gerast vitjanarvinir og tosar við fólk, sum hon kennir, til dømis tá hon sjálv gongur til fimleik. Har eru jú fleiri fólk, sum kanska høvdu hóskað væl saman við onkrum, ið bíðar eftir vini gjøgnum Vitjanartænastuna:
    - Eg spurdi eina einaferð eina, um hon var pensjónerað og um hon kanska hevði tímað at verið vitjanarvinur. Hon vildi bíða eitt sindur og tað gekk ikki leingi, so hevði hon játtað at vera við okkum og vitja eina konu.
    Tað gevur henni heilt nógv, at kunna hjálpa fólki upp á hendan mátan. Eyrith var sjálv vitjanarvinur á Lágargarði í byrjanini:
    - Tað snýr seg um at lurta – og hetta arbeiðið er ótrúliga gevandi, sigur Eyrith Guttesen Leyni at enda.

  • Torgerð Jallgrímsdóttir

    Tiltakslimur

    Torgerd Jallgrimsdottir Tiltakslimur +298 79 32 34 torgerd@redcross.fo

    Torgerð Jallgrímsdóttir

    Tiltakslimur

    Torgerd Jallgrimsdottir

    Yrki:

    Deildarleiðari á Korndalsbýlinum á Eiði, útbúgvin sjúkrarøktarfrøðingur, starvaðist á Landssjúkrahúsinum í 11 ár, og hevur starvast á sjúkraflutningstænastuni á Landssjúkrahúsinum í trý ár.

    Royndir:

    Tiltakslimur í nevndini síðan 2023, gjørdist fyrstuhjálparinstruktørur í 2019, er instruktørur í sálarligari fyrstuhjálp, var eitt skifti samskipari í fyrstuhjálp á skrivstovuni í Reyða Krossi.

    Serlig ábyrgd:

    - Tilbúgving:
    - Samarittatænasta
    - Fyrstuhjálparaskeið

    Um: 

    Tórgerð er útbúgvin sjúkrarøktarfrøðingur og hevur starvast á Landssjúkrahúsinum í 11 ár, frá 2012 til 2023, tá hon gjørdist deildarleiðari á Korndalsbýlinum á Eiði, sum er partur av heimatænastuni VEKS. Hon hevur eisini starvast á sjúkraflutningstænastuni á Landssjúkrahúsinum í trý ár.
    Í Reyða Krossi hevur Tórgerð gjørt nógv við fyrstuhjálp. Hennara áhugi liggur serliga innanfyri fyrstuhjálp, sálarliga fyrstuhjálp, samarittar og tilbúgving sum heild. Hon tók instruktørskeið sum fyrstuhjálparinstruktørur í 2019 gjøgnum Reyða Kross:
    - Hetta undirvísti eg í í mínari frítíð fram til 1. februar í 2022, tá eitt hálvtíðarstarv, sum fyrstuhjálparinstruktørur og samskipari í fyrstuhjálp bleiv upprættað. Hetta arbeiðið segði eg seinni upp, tá eg fór til heimatænastuna VEKS í november 2023.
    Samstundis, sum hon fór í annað starv gjørdi hon av at halda fast við Reyða Kross á tann hátt, at hon fór upp í nevndina, og í dag er hon aftur vorðin sjálvboðin fyrstuhjálparinstruktørur umframt, at hon nú er instruktørur í sálarligari fyrstuhjálp hjá Reyða Krossi. Tórgerð bleiv sum ein av teimum fyrstu instruktørur í sálarligari fyrstuhjálp í 2022. Hon sá sjálv stóran tørv á at fáa hesa vitanina út til fleiri fólk, tá hon arbeiddi sum sjúkrarøktarfrøðingur á Landssjúkrahúsinum:
    - Eg saknaði eina tilbúgving í Føroyum, sum eitur “Sálarlig fyrstahjálp”. Her hugsi eg, at Reyði Krossur hevur nógv at bjóða og kann verða ein viðleikari í at breiða hesa vitanina í føroyska samfelagnum.
    Í dag hevur Reyði Krossur stórar ætlanir við sálarligari fyrstuhjálp. Millum annað eru fimm nýklæktir instruktørar í sálarligari fyrstuhjálp, sum skulu vera við til at halda skeið fyri einstaklingum, fyritøkum – og fyri øllum teimum sjálvbodnu, sum eru í hjálparfelagsskapinum:
    - Vit vilja, at fólk skulu vera betur ílatin til at møta fólkum, sum onkursvegna eru rakt av sorg ella kreppu. Hetta við sálarligari fyrstuhjálp var til dømis uppi at venda, tá flóttahjálpin byrjaði og tað er í slíkum førum vit ynskja at vera so klár sum møguligt at taka ímóti fólki, sum kunnu hava brúk fyri okkara hjálp, sigur Tórgerð.
    Tað kann tykjast torført at skilja, hvat sálarlig fyrstahjálp er fyri nakað, tí tað fevnir breitt og er í nógvan mun tengt at ítøkiligu støðuni. Tórgerð greiðir frá, at sálarlig fyrstahjálp er tann fyrsta hjálpin, sum kann gevast einum fólki í kreppu – men hon skal endiliga ikki blandast við kreppuhjálp, sum er hjálp veitt av útbúnum fólki:
    - Ein og hvør kann veita sálarliga fyrstuhjálp! Tað snýr seg nevniliga um at vera eitt empatiskt medmenniskja – at tú ert til staðar, tosar við viðkomandi, sum hevur verið úti fyri onkrum ógvusligum og møguliga setir viðkomandi í samband við aðra hjálp, um tú metir, at tørvur er á tí. Tað kann vera, at tørvur er á læknahjálp – ella at tú ringir til ein avvarðandi hjá persóninum.
    Innanfyri sálarliga fyrstuhjálp verða orðini ”Look, Listen, Link” nógv brúkt um júst hetta. Á føroyskum hygg, lurta og knýt, sum er at orientera seg um støðuna, geva sær tíð til at vera nærverandi, og seta persónin í samband við aðra hjálp ella við síni nærmastu, um tørvur er á tí.
    Reyði Krossur hevur arbeitt við kropsligari fyrstuhjálp heilt frá byrjan av, men hvussu við tí sálarliga, spyr Tórgerð:
    - Tað er eitt heilt menniskja aftanfyri ein brotnan arm, og tað er týdningarmikið at vit síggja heila menniskjað.
    Tað eru fleiri spurningar uppi at venda um, hvussu Reyði Krossur skal brúka sálarliga fyrstuhjálp. Í Íslandi hava tey til dømis PFA-toymi (PFA = Psychological First Aid). Hesi toymini fara út á staðið, tá onkur stór vanlukka hendir, so sum eldgos og omanlop.
    - Kanska slík toymi eisini kundu verið í Føroyum, sigur Tórgerð at enda.